PROLOCO SANT'ARPINO

'O presebbio è pronto
Bambenié, che vien' a ffà
Nata vota 'ncopp' 'a paglia a tremma?
'Ossaje ca ll'ommo è cagnato
E nun s'arricord 'e pregà?
Se droga e sta dint' 'o peccato
Arrobba, distrugge, jastemma
Pe' sorde è pronto a sparà.
'Ossaje ca si uno stramazza
'Nt'a 'na strada affullata
Nisciuno s'avota a guardà?
L'ommo nun tene cchiù core...
Simmo tante 'nfame e brigante:
Nisciuno se po' cchiù scanzà.
Comm'a 'nu braco 'e liune
"'O sazio nun crede 'o diuno."
Sarrà che 'o prugresso, abbondanza
'Nbriacano pure 'o pastore
Ma Tu si' ' o Salvatore
Viene pe' ce cunsulà.
'O saccio pecchè t'appresiente
Chistt'anno ancor' a tremmà
Dint'a 'sto munno 'e fetiente
Sicuro quarche bbuono ce sta.
'Nce stanno 'e ccriature 'nnucente
'E povere viecchie scurdate
E ancora tante spose cuntente
'E stennere 'nata 'nfasciata.
'Nce sta 'na mamma scetata
Tutt'a nuttata a pregà
'Nt' 'o core 'na spina 'mpizzata
Pe' 'o figlio ca nun ppò turnà.
Vint'anne: 'na vita struncata
'Na ddose mal'ammiscata
'Ncopp'a 'nu lietto 'e pezzente
'Nu ciunco trattene 'o lamento
Speranno 'e pote' camminà.
'Ovide 'sto munno scujeto?
E' 'nu cavallo 'mpazzuto
Ca requia nun riesce a truvà.
Bambenieè, viene povere e annuro
Si' 'a pace, 'a speranza, 'o perdono...
Fa' che 'o frate 'n'accide cchiuù ' o frate
E pur 'o malamente addeventa bbuono.

Di Pasqualina Iavarone Pezzella